नुकताच मोबाईल अनलॉक केला होता… वर आलेले नोटिफिकेशन वाचून मन एकदम विषण्ण झाले… बातमी खरी आहे का हे तपासून पाहण्यासाठी ट्विटर देखील ओपन करता येत नव्हते…त्यावेळी तोंडातून जोरात मम्मी अशी हाक बाहेर पडली… तिकडून मम्मी विचारते काय झाले?… मी ,”अग, शेन वॉर्न गेला”…
आधीच १००वी कसोटी खेळणारा विराट कोहली आणि ९६ धावांवर रिषभ पंत हे बाद झाल्याने उदास झाले होते. हे काय कमी होते का त्यातच मनाला चटका लावून जाणारी एक बातमी त्या नोटिफिकेशन मधून कळाली… फिरकीचा जादूगार अर्थातच ऑस्ट्रेलिया संघाचा महान गोलंदाज शेन वॉर्नची या जगातून अचानक एक्झिट. या बातमीने संपूर्ण क्रिकेटविश्व,चाहते हळहळले.
लेगस्पिनचा बादशहा असलेल्या वॉर्नचे ‘द बॉल ऑफ सेंच्युरी’, सचिन तेंडुलकरला आऊट केलेले, ऍशेसमध्ये त्याने घेतलेले काही अप्रतिम विकेट्स असे अनेक व्हिडीओ सध्या सोशल मीडियावर दिसत आहेत.
जेव्हा क्रिकेट मला समजायला लागले तेव्हा वॉर्नला फार कमी वर्षेच आतंरराष्ट्रीय क्रिकेट खेळताना पाहिले. यामुळे त्याचे जास्त क्रिकेट पाहायला मिळणार नाही असे वाटले होते. मात्र नंतर आयपीएल (इंडियन प्रीमियर लीग) आल्याने एक क्रिकेट चाहती म्हणून लकी ठरले.
त्याकाळी इंग्लंड, ऑस्ट्रेलिया संघाच्या खेळाडूंची एक वेगळीच प्रतिमा भारतीय चाहत्यांच्या डोक्यात होती. त्यातच १९९२च्या काळात एक ब्लॉण्ड रंगाचे केस, कानात खडा घातलेला तो एक गोलंदाज ज्याने भारतीय संघाविरुद्ध कसोटी क्रिकेटमध्ये पदार्पण केले. भारतीय क्रिकेट रसिकांसाठी क्रिकेटचा देव असणाऱ्या तेंडुलकरला तर वॉर्नने मैदानात फार त्रास दिला असला तरी भारतीय चाहते देखील त्याच्या गोलंदाजीची वाहवा करतातच.
पदार्पणाच्या त्या कसोटी सामन्यात वॉर्नने एकही चेंडू टाकला नव्हता. तर पुढे जाऊन कसोटीमध्ये जलद ७०० विकेट्स घेणारा तो दुसरा क्रिकेटपटू ठरला होता. आतंरराष्ट्रीय क्रिकेटमध्ये १००१ विकेट्स घेणाऱ्या वॉर्निने त्याच्या अफलातून बॉलिंगने त्याच्या संघ सहकाऱ्यांना तर आश्चर्यचकित केले होतेच त्याचबरोबर विरोधी संघ देखील त्याच्या बॉलिंगचा दिवाना झाला.
वॉर्नच्या फिरकीमुळे अनेकांनी ‘मला त्याच्या सारखाच गोलंदाज व्हायचा आहे’ असे ठरवले. एकाच वर्षात कसोटीमध्ये ९६ विकेट्स घेण्याची कामगिरी करणारा देखील तो एकमेव गोलंदाज आहे.
Pranali K.
Sports ArTcls 