आयपीएल२०२१च्या अंतिम सामन्यात चेन्नई सुपर किंग्जने कोलकाता नाईट रायडर्सला २७ धावांनी पराभूत करत कोलकाताचे तिसऱ्यांदा आयपीएल चॅम्पियन होण्याचे स्वप्न भंग केले.
कोलकाता या आयपीएलमध्ये पराभूत झाला असला तरी वेंकटेश अय्यर या खेळाडूने अप्रतिम कामगिरी केली. चेन्नईने अंतिम सामन्यात कोलकाता समोर १९३ धावांचे लक्ष्य ठेवले होते. वेंकटेशने शुबमन गिल सोबत ताबडतोब फलंदाजी करत पहिल्या विकेटसाठी १०.४ षटकामध्ये ९१ धावांची भागीदारी केली. यावेळी त्याने जोश हॅझेलवूड, रवींद्र जडेजा, ब्रावो, शार्दूल ठाकूर या गोलंदाजांना त्याने चांगले प्रत्युत्तर देत अर्धशतक केले. त्यांनतर मात्र कोलकाताचा संघ ढासळतच गेला.
दुसऱ्या क्वालिफायरमध्ये कोलकाताने दिल्लीला ३ विकेट्सने पराभूत करत अंतिम सामन्यात प्रवेश केला. या विजयामध्येही वेंकटेशने त्याच्या अटॅकिंग फलंदाजीने तुफानी ५५ धावा करत संघाच्या विजयाचा मार्ग मोकळा केला.
या अष्टपैलू खेळाडूने २०२१च्या आयपीएलमध्ये १० सामन्यात चार अर्धशतकासह ३७० धावा करत ३ विकेट्स घेतल्या आहेत. यामध्ये त्याने ३७ चौकार आणि १४ षटकार लगावले आहेत. मध्यप्रदेशच्या या खेळाडूचा टी२० प्रकारातील स्ट्राइक रेट १३३.५० एवढा तर इकॉनॉमी रेट सातपर्यत असल्याने कोलकाताने त्याला आयपीएल२०२१साठी असलेल्या लिलावामध्ये संघात घेतले. त्यानंतर वेंकटेशने विजय हजारे ट्रॉफीमध्ये पंजाब विरुद्ध १९८ धावा करत २ विकेट्स पण घेत आपण आयपीएलसाठी तयार आहोत हे दाखवून दिले.
करीयरच्या सुरुवातीला वेंकटेश मध्यम फळीत फलंदाजीला करत होता. मात्र त्याच्या प्रशिक्षकाने त्याची फटकेबाजीची शैली बघून त्याला मर्यादित षटकाच्या सामन्यासाठी सलामीला येण्यास तयार राहा असे सांगितले. नंतर त्याने २०२१च्या विजय हजारे ट्रॉफी आणि सईद मुश्ताक अली ट्रॉफी या स्पर्धांच्या काही सामन्यात सलामीला येत फलंदाजी केली. यावेळी त्याने उत्कृष्ट फलंदाजी करत अनेक चेंडू सीमारेषेपार पाठविले.
आयपीएलमध्ये पदार्पणाच्या सामन्यातच या डावखुऱ्या फलंदाजाने बेंगलोर विरुद्ध दुसऱ्या क्रमांकावर फलंदाजी येताना नाबाद ४१ धावा केल्या. या सामन्यात त्याचे एक्सट्रा कव्हर ड्राईव्ह शॉट्स, बॅकफूटवर चांगले नियंत्रण बघायला मिळाले. कायले जॅमिसनला मारलेला तो उत्तुंग षटकार आणि हसरंगा याच्या गोलंदाजीवरही त्याने चांगली फटकेबाजी केली.
फलंदाजी करताना सुरुवातीला चेंडू बघून त्याप्रकारे बॅट आणि हात वळवण्यात वेंकटेश पटाईत आहे. अशीच फलंदाजी त्याने दिल्ली विरुद्धच्या क्वालिफायर सामन्यात केली. कगीसो रबाडासाठी हा आयपीएल हंगाम काहीसा निराशाजनक ठरला आहे. तरीही शेवटी तो आतंरराष्ट्रीय स्तरावरचा गोलंदाज पण यालाही वेंकटेशने चौकार-षटकार लगावत उत्तम फलंदाजी केली. त्याचबरोबर शुबमन गिलसोबत सलामीला येत आर अश्विन, अक्षर पटेल, आवेश खान यांच्या गोलंदाजीचाही चांगला समाचार घेतला.
२६ वर्षीय या मध्यमगती वेगवान गोलंदाजाला येणाऱ्या टी२० विश्वचषकासाठी भारतीय संघामध्ये नेट बॉलर म्हणून निवडले आहे. त्याने लीग सामन्यात दिल्ली विरुद्ध गोलंदाजी करत ४ षटकात २९ धावा देत २ विकेट्स पटकावल्या. यावेळी स्फोटक फलंदाज शिमरॉन हेटमायरला बाद करत आयपीएल करीयरमधील पहिली विकेट घेतली.
चेन्नई सुपर किंग्जचा ऋतुराज गायकवाड आणि कोलकाता नाईट रायडर्सचा वेंकटेश अय्यर हे दोघेही युवा सलामीवीर फलंदाज यंदाचे आयपीएल चांगलेच गाजवत आहेत. ऑरेंज कॅप परिधान करणाऱ्या ऋतुराजची ही दुसरी आयपीएल तर वेंकटेशची पहिलीच आयपीएल आहे. मात्र या दोघांनीही त्यांच्या प्रभावशाली फलंदाजीने क्रिकेटप्रेमींना आश्चर्यचकित केले आहे.
Sports ArTcls 